Yard crab inna foreen writes: Big fish an likkle fish ting

Massa tenk yuh mr h fi mek wi noh wah deh gwaan bout di place it look like seh nut’n nuh change since mi lef yad. Big fish an likkle fish a gwaan same way. Wat a ting sah. The likkle fish dem wan betta fi demself but boi de system fuck dem up again to rass.

Da smaddy deh wah set up dah house ting deh fi get a medal cause a lang time battyman who inna dem shyt need someweh fi start again, sorry doh seh the smaddy resign an lef di ting but mi haffi wonda if a resign dem resign or a foce dem foce dem out and dem just give up. An nuh de fus time wi si dem deh smaddy deh get foce outta di ting …. A lie?

Mi waan know a wah a go happn to di ikkle fish dem inna de pond now and dat deh oda place deh nah do nuttin fi Battyman, as u did seh mr h why dem neva tek it inna de fus place? Mi glad seh de yute dem tek it dem still dem nuh fi give up dem fi stay wid it, if dem can start dat dat mean dem can start dem own fight outside tu. When mi did inna yad a de same struggle did a gwaan but dem time deh tings did more nicer and people did have some heart but it look like seh everyting crash now. Mr h mi noh seh u did inna dem oda tings deh tu like GLABCOM and soh an yuh undastand all the runnings so mi wi believe yuh to a point. One ting doh mr h try fi get more from de oda side too so we can see wah a gwaan, mi noh it nah go easy still cah dem nah go waan talk to yuh, fi close dung sumting like dat weh important inna dem yah time yah bad starrrr.

Wah we can do fi help do mr h mi noh seh u always a ask fi tings fi post pon yah so das y mi a write dis inna patios fi tek it to dem. De forena dem nah go get fi see it yet but u can translate it as mi si yuh do inna other tings pon yah. Di pocket short still but yuh noh she wi ova yah a watch wah a gwaan and mi vex to rass.

Look how long di big fish dem di deh and is like nuttin nuh betta to rass same ting a gwaan but different yute now, wah a happen wid de lesbian dem dem still a stay weh from wi to? New ting haffi go gwaan man, de yute dem need better ting yah man can have uptown fish and tek up fi likkle fish it nah go lebel as dem ole people woulda seh.

Tanks yah h fi dis blog yah a nuff yute ova yah a see it an a read to but put more patois man an mek it more yad man, mi noh seh nuff forena a look tu an just watch yuh head tu cah dem tricky an hypocrit dem, pussy dem laf wid yuh an tab yuh inna yuh back.

Big up yuself

Yard crab inna foreen

San Francisco